EPFO-a tel thei hlawh bithliah tipung, hnathawk nuai 51 chuang huam pha dawn

Union Cabinet chuan Employees' Provident Fund Organisation (EPFO)a tel thei chin mandatory wage ceiling, hlawh bithliah zat chu thla khatah Rs 15,000 aṭangin Rs 25,000-ah a tisang. He ruahmanna thar hian ram chhunga hnathawktu nuai 51 chuang hnenah venhimna 'social security cover' sang zawk a pe thei dawn a ni.

EPFO hnuaia wage ceiling hi kum 2014 aṭang khan ennawn a ni tawh lo a, hemi kum hian Rs 6,500 aṭangin Rs 15,000-ah tihsan a ni. Kum 12 hnuah sorkar chuan hlawh leh khawsak sensote a san chhoh zel dan ngaihtuahin, hlawh limit hi Rs 25,000-ah a tisang ta a ni.

Ruahmanna thar hnuaiah hian, thawktu hlawh lak zat tam zawng hi EPF (Provident Fund), EPS (Pension) leh EDLI (Insurance) hnuaiah ziah luh leh tura tih an ni ang. EPF atan a tlem berah an hlawh aṭanga 12% cut a nih rualin, a ruaitu lamin chutiang zat chiaha an tum a ngai ve bawk. Sorkar laipui chuan EPFO-a tel thei chin hlawhbi a tihsan avangin, thawktu eng emaw zat an luh belh dawn a, hei vang hian hmalakna atan hian kum tin budget-ah Rs vbc 11,339 vel a sen a ngai dawn a ni.

Information and broadcasting minister Ashwini Vaishnaw leh labour minister Mansukh Mandaviya te chuan hlawhbi huam chin siamṭhat hi September 17 aṭangin hman ṭan tur a ni tih an puang a, hnathawktute hmakhua atan ruahmanna pawiimawh tak a ni tih an tarlang nghal bawk.