India leh Pakistan lawng insut avangin MEA-in Pakistan palai ko

India leh Pakistan lawng, North Arabian Sea-a September 15 Thawhlehnia an insut hnuah Ministry of External Affairs chuan New Delhi-a Pakistan Charged'Affaires chu nimin Nilaini khan koin, Pakistan Navy unit te tuipuia India Navy laka an chet dan chu pawm theih loh leh professional lo taka thil tih a nih thu sawiin a dem takzet tih a tarlang.

Tarlan danin, September 15 khan Pakistan Navy lawng chuan India indo lawng-in tihdan phung pangngaia North Arabians Sea-a surveillance an neih lai chu chak taka kalin a su niin an sawi. Lawng insutnaah hian thil chhe lian tham erawh a thleng lo nia sawi a ni.

He thil thlen danah hian Pakistan chuan India nena kum 1991 April-a inremna an siam tawha article 10-na chu a bawhpelh niin MEA thuchhuah chuan a tarlang. Pakistan palai chu he thil thlengah hian an rama thuneitute nen hma lak dan ngaihtuah turin hriattir a ni bawk.

Lawng insutna thleng chungchangah hian Pakistan-a India palai pawh Pakistan Ministry of Foreign Affairs chuan an ko ve bawk a ni.Kum 2011, June thla khan Pakistan Navy lawng, Babur leh India indo lawng, INS Godavari te chu an insu tawh bawk a ni.