Supreme Court-in ‘JAN SOOCHNA SEVA' tlangzarh

Supreme Court chuan Thawhṭannia Hindi Diwas hman pualin vantlang tana thutlukna pawimawhte awlsam zawka hriat zung zungna tur, ‘Jan Soochna Seva’ (Public Information Service) chu Hindi ṭawngin a tlangzarh thu a puang. He hmalakna hian rorelna leh court thutlukna hrang hrangte mipuite tan hriatthiam awlsam zawk leh huapzo zawka tarlan a tum a ni.

‘Jan Soochna Seva’ hnuaiah hian Supreme Court-in thutlukna pawimawh a siamte leh thupek hrang hrangte chu tluangtlam leh hriatthiam awlsam zawk turin tawi te tea tarlanna 'summaries' pekchhuah ṭhin a ni ang. Hemi bakah minute 15 aṭanga minute 30 thleng a thui audio leh video bulletin pawh tlangzarh tel a ni dawn bawk.

He hmalakna hi tualchhung mipuiten court-a thubuai nei leh rualbanlote tana hriatthiam awlsam tura duan a ni a, dan thutlukna hrang hrang leh a kaihhnawhte anmahni ṭawng ngeia awlsam taka an hriat thiam theihna tur a ni. Dan leh lehkhabu thui tak tak chhiar harsa tite tan audio leh video kaltlanga thuchhuah hi a tangkai hle beisei a ni.

Supreme Court thuchhuah chuan a bul ṭannan Hindi ṭawng hman rih a nih thu leh, nakin zelah chuan tualchhung ṭawng dangahte pawh tlangzarh zui zel tum a nih thu a tarlang. Hnam leh ṭawng hrang hrang hmangtu mipuiten thutlukna pawimawhte anmahni ṭawng ngeiin an hre tawh dawn a ni.