Bengaluru-a mimal hmunah damdawi lem eng emaw zat man

Karnataka khawpui Bengaluru-a hmun pakhat, Krupa Healthcare, Minerva Circle bul a mi chu Inrinni khan Special Investigation Team (SIT) chuan dapin, damdawi lem leh thi tawh tam tham tak mai an man a, a hmun neitu Veeresh Kumar Jain chu man a ni tawh bawk. SIT leh drug inspector-te hian chhui zui mekin, state paruka hmun 10-ah dap chhuah beihpui an nei chhunzawm nghal.

Damdawi lem an man zingah hian cancer enkawlna, ICU-a hman chi injection chi leh life-saving drugs an tih mai pawimawh tak tak a tel a ni. Police-te tarlan danin, damdawi lem siamtute hian Bengaluru khawpui chhunga hospital leh clinic 90 aia tam hnenah 50% discount vel pein damdawi lem te hi an sem chhuak nia rin a ni. Hospital leh clinic hrang hrang damdawi la tute hi chhui zui mekin Karnataka FDA portal chuan batch number-te a block nghal bawk.

Damdawi lem dap chhuahna hi August 18 khan Bidadi-a farmhouse pakhat an dap naa Rs vbc 4.91 hu an man chhuah aṭanga chhui ṭan a ni a, a siamtute hian damdawi man tlawm te leh thi tawhte chu la in, hming leh trademark company lian tak tak hming hmangin damdawi thar leh to tak niawm takin an lo hralh chhawng ṭhin a ni.

Heng damdawi hrang hrang, a lem nia rinhlelhna a pun chhoh zel avangin laboratory-ah composition testing neih mek a ni. Sorkarin he thil dik lo tihna lian taka ruahmanna siamtu leh buaipuitu ber Prashanth chu man turin a zawng mek a, he network thlunzawm leh pawisa chet vel dan zawng zawngte chu man chhuah tura zawn mek zel a ni bawk.