NMC-in MBBS seat matrix ennawn, zirlai lak belh lo turin vaukhan

National Medical Commission (NMC) chuan kum 2026-27 atan MBBS seat matrix a siam ṭha leh a, tualchhung medical college leh counselling authority-te chu sorkar thuneitute pawmpui chin bak zirlai la lo turin vaukhanna a tichhuak nawn.

NMC public notice tharah chuan Medical Assessment and Rating Board (MARB) leh appeal committee-te thutlukna angin medical college thar tura pawmna leh seat awmsa tihphunnate tihchhuah a ni. Thuchhuah tarlan danin, ram chhung college 836-ah MBBS seat 1,40,214 awm tling tawhin, tarlan hmasak seat 1,27,028 aiin seat 13,186-in a tam tawh zawk a ni.

Heng seat tihbelh zinga 10,400 hi private college-a mi a ni a, 2,786 chu sorkar college-a mi a ni. Regulatory body hian seat thar pawmpui mek leh ngenna dil mek awm avangin counselling committee-te pawh MARB-in seat zat a pawmpui chu seat awm zat atan hmang lo turin a ngen. Approved annual intake bak zirlai an la a nih chuan National Medical Commission Act, 2019 bawhchhiaa ngaih an nih tur thu leh hremna an tawh tur thu an tarlang.