18th BRICS summit-ah 'New Delhi Declaration' pawm

India kaihhruaina hnuaia neih, ni hnih awh 18th BRICS Summit neih chu minin khan an zo ta. Member ram hrang hrangte thawh hona ṭha zawk awm theihna turin 'New Delhi Declaration' chu lungrual takin an pawm.

BRICS ram 11-te hian Zirtawpni zan aṭanga Inrinni zing thlenga sawi hona an neih hnuah inremna hi an pawm a ni. Inbiakna neih chhung hian Iran chuan US leh Israel-te beihna chhan letna leh tharum thawhna demna uar taka tarlan a phut a, Iran beihna tuartu UAE chuan Iran-in Gulf ram hrang hrang a beihna chu dem zawk turin a phut ve thung. Hetiang karah India hruaina hnuaiah ram pahnihte remtihnain declaration hi pawm a ni.

Summit-ah hian member ram pariat aṭangin ram hruaitu an rawn tel thei a, Russia president Vladimir Putin, China president Xi Jinping, Iran president Masoud Pezeshkian, leh Indonesia, Ethiopia, Egypt, leh South Africa hruaitute an tel thei. Brazil leh UAE erawhin an ram aiawh turin high-level representative an tir thung.

India chuan summit a kaihhruaina hnuaiah hian Miscro, Small, and Medium Enterprises (MSME) lam hawi chawilarna lam uarin, summit kaltlang hian MSME tihhmasawnna tur hrang hrang chu ngaihpawimawhah a nei tih a tarlang. Heng MSME kaltlanga hnathawhte chu khawvel huap sumdawnna thlenga chawikan chu India thil tum zinga pakhat a ni bawk.

Modi-a'n BRICS ramte thawh hona nghet zawk neih phut

PM Modi chuan nimin-a BRICS summit inkhawm neihnaah, BRICS ramte chu tun aia inlungrual zawk leh inrintawnna nghet zawk neih a phut thu a sawi. Technology leh critical minerals hmanga inbeihna lakah pawh fihlim turin member ramte a ngen a, innghirnghona awm chuan khawvel pum hmasawnna a tiṭhuanawp zawk tih a sawi.

Modi chuan khawvel chhim lam ramte inkarah thechnology thar hman kawnga chak zawka thawh hote uar a ṭul thu a tarlang bawk. BRICS thawh hona chu sorkar leh sorkar inkarah chauh ni loin, kutkawih eizawnna, loneih, zirbingna, hmeichhia, ṭhalai leh vantlang mipuite tihhmasawnna kawngah thawh hona huang zauh a nih thu a tarlang. Khawvel chhim lam hmasawnna tur chu tum ṭum summit-a hmun laili changtu a nih thu a sawi.

Eng nge 'New Delhi Declaration'?

Summit ni hmasa berah BRICS member ramte chuan thawh hona atana an ngaih pawimawh thil hrang hrang awmna "New Delhi Declaration' chu lungrual taka pawmin, he delcaration hnuaiah hian tum thuhmun, sumdawnna, leh khawvel in relbawlna ṭha neihte chu BRICS member ram-te hian an pawm a ni.