18th BRICS summit vawiin aṭangin ṭan dawn

BRICS summit vawi 18-na chu India kaihhruaina hnuaiah vawiin hian Bharat Mandapam, New Delhi-ah neih a ni dawn a, naktuk thleng a awh ang. Summit hmang tur hian BRICS member ram hruaitu eng emaw zat an rawn tel dawn a ni. BRICS summit hi India hruaina hnuaia neih vawi lina niin kum 2012, 2016, leh 2021-te khan India-in a lo thleng tawh bawk a ni.

Kumin summit thupui atan hian "Building for Resilience, Innovation, Cooperation, and Sustainability" tih hman a ni. Human-centric leh 'Humanity First' tih lantir thei tur zawnga duan niin hei hi prime minister Narendra Modi-a'n 2025 Rio Summit-a a rawtna anga siam a ni. Hei bakah khawvel chhim lam ramte hmasawnna leh thawh hona tihchak zual zel chu an thil tum pakhat a ni dawn bawk.

Ram hruaitu rawn tel tur zingah hian Russia president Vladimir Putin leh Iran president Masoud Pezeshkian te chuan nimin khan New Delhi an thleng tawh. China president Xi Jinping pawh kumin hian a rawn tel dawn a, kum sarih hnua India-a a rawn zin leh hmasak berna tur a ni. Heng bakah hian Malaysia, Indonesia, Vietnam leh Philippines hruaitute pawh summit-ah hian an rawn tel dawn a ni.

BRICS member ram hi 11-ah tihpun tawh niin Brazil, Russia, India, China leh South Africa bakah Iran, UAE, Saudi Arabia, Egypt, Ethiopia bakah Indonesia pawh BRICS-ah hian an tel belh tawh a ni.

Kumin summit agenda-ah hian khawvel ram hrang hrangte thawh hona - supply chain tihchak, local currency hman uar, AI leh technology hmanga thawh ho, leh energy thianghlim hman chungchangte a tel. Khawvel geopolitics boruak sosang tak leh Ukraine-Russia indona, leh Middle East buainate awm reng karah India hian BRICS hruaitu anga a mawhphurhna hmangin laichinna ṭha zawk siam a tum ber a ni bawk.