India leh France-in space sector-a thawh dunna tur inremna thar ziak

India leh France-te chuan ram pahnih inzawmna tihchangtlun thar zel nan van thengreng daidarna lam, space sector-ah thuk zawka thawk hona tur inremna thar thuthlung pathum an ziak. Inremna tharah hian ram pahniha mimal sumdawnna hmun 'private sector' te kaltanga thawh dun theihna tur thar ziah a nih thu nimin khan an puangzar.

He inremna hi France khawpui Paris-a neih International Space Summit-ah tarlan a ni. Inremna ziah zinga pakhat hi France-a Safran Space leh India-a Dhruva Space-te inkarah ziah niin, he thawh dunna atan hian Euro vaibelchhe 5 aia tlem lo hman a ni ang. Dhruva Space hian India-in space-surveillance constellation atana satellite 52 kah chhuah a tum 'SBS-III' mission atan Safran Space aṭangin communication systems, optical payloads leh ground station-te a dawng dawn a ni.

French launch-services provider RIDE! chuan India firm 'TakeMeToSpace' tana satellite pahnih kah chhuah kawngah pui tura inremna an ziak bawk a, AXISCADES leh U-Space-te pawhin India-a microsatellite market tiphuisui tur leh 'Make in India' hnuaia thawk ho zel turin thawhhona thar an ziak bawk.

India leh France hi kum 50 chuang ISRO leh French agency CNES kaltlangin space sector-ah hian an lo thawkdun tawh a ni. Tun ṭuma mimal 'private sector' te inrawlh theihna leh thawh hona thar hian ram pahnih inkar inzawmna leh thawh dunna a tihchak thar lehzual beisei a ni.