Naupang himna chungchangah NCPCR hmaah Meta inlan

Child Sexual Abuse Material (CSAM) hmanga naupang, mipat hmeichhiatna lam rawngkai thlalak leh video chi hrang hrang Meta Platform Facebook leh Instagram-a thehdarh ṭhin chungchangah, ramchhunga naupang himna lam kengkawhtu pawl National Commission for Protection of Child Rights (NCPCR) chuan Meta hotute chu Nilaini khan NCPCR panel hmaah koin zawhna engemaw zat an zawtfiah.

Meta platform-ah hian naupang humhalhna dan, Protection of Children from Sexual Offences (POCSO) Act leh Information Technology (IT) Act kalh zawnga siam, naupang pawngsualna thil leh mipat hmeichhiatna rawngkai visual content-te hmuh tur a awm zeuh zeuh avangin, commission hian he thil hi thil pawi zawk thlen thei a ni tih hriain hma a la zui a ni.

Panel hmaah Meta aiawhte chuan naupang humhalhna tura hmalakna an neih leh safety protocol hrang hrang an neih mekte an pharh a, NCPCR hotute erawh chuan an hmalaknate chu duh tawk loin, hetiang thil hi awm lo tawp tura hmalak leh a taka bawhzui a pawimawh takzet a ni tih an hrilh nawn.

Commission chuan hetiang thil a thlen leh tawh lohnan ruahmanna khauh zawk siam tura hrilhin naupang venhimna tura an ruahmante hi uluk taka zawm tura phut an ni bawk. NCPCR hian Meta-in POCSO Act leh Information Technology Rules a zawm leh zawm loh chu uluk takin a thlithlai reng dawntih a sawi.