Uzbekistan hmarcha leh theibuhfai India-in la lut dawn

India sorkar chuan Central Asia ram pakhat, Uzbekistan aṭangin hmarcha leh theibuhfai lak luh a phal thu nimin khan a puang. Prime minister Narendra Modi-a'n August 29 leh 30-a Uzbekistan a tlawh hnuah, Ministry of Agriculture and Farmers’ Welfare chuan notification chhuahin Uzbekistan aṭanga lak luh phalte hi a tarlang.

Tunhma lam khan India hian ram dang aṭanga thlai thar lak luh hi a lo khuahkhirh thin. Mahse, Uzbekistan nen hian thawh hona leh sumdawnna tihchangtlun zawk a nih theih nan thlai hriselna dan hman 'phytosanitary risk-management system' hmanga endik zel turin phalna hi pek a ni ta a ni.

Sorkar thuchhuahin a tarlan danin, Uzbekistan hmarcha leh theibuhfaite hi natna hrik, thlai tichhe thei hrik hrang hrang leh lei balte tel lo ngei a ni tih finfiah hmasak tur a ni ang. Hmarchaah phei chuan rannung leh hrik 'tomato russet mite' leh 'Tomato brown rugose fruit virus' te a awm lo ngei tih finfiah hmasak zel a ngai dawn.

India hi khawvela hmarcha thar chhuak hnem ber, hmang hnem ber leh thawn chhuak hnem ber ram a ni zui zel dawn a ni. Uzbekistan hmarcha lian tham chawk luh tur hian India hmarcha hralhna hi a khawih pawi lo tura ngaih a nih laiin, Uzbekistan theibuhfai lak luh erawh chuan Maharashtra, Karnataka, Gujarat leh Andhra Pradesh-a tualchhung theibuhfai tharchhuaktu tan inelna thar a thlen tura rin a ni thung.