WHO-in MNTE hlawhtling taka kalpui avangin India chawimawina hlan

India-in kum 10 liam ta chhunga ramchhunga nu leh naupiang thar laka maternal and neonatal tetanus (MNTE) venna ṭha taka a kalpui avangin World Health Organization(WHO) chuan Thawhlehni khan hna thawh ṭhat chawimawina a hlan. He chawimawina hi WHO Regional Committee 79th Session neihah hlan niin, India hian WHO South-East Asia Regional awards pahnih a dawng a ni.

Chawimawina dang India hnena hlan hi natna inkaichhawn theih loh chi nuaibo na tura primary healthcare kaltlanga an hnathawh bakah, hypertension leh zunthlum natna nuaibo a nih theihna tura protocol-base kaihhruaina an siam avanga hlan niin, hriselna lam kawnga India hmasawnna tilangtu a nih thu an tarlang.

Union health minister JP Nadda chuan X kaltlanga post a siamah India hnena heng chawimawina hlan a nih thu hi tarlangin. Prime minister Narendra Modi kaihhruaina hnuaia India-in mipui hriselna tihhmasawnna hna, primary healthcare hmanga a thawhte leh natna inkai chhawn theih leh theih loh chi-te nuaibo tura sorkar hmalakna chuan mipuiteah rah ṭha a chhuah theih phah thu a sawi bawk. Heng chawimawinate hi healthcare thawktute leh a hmatawnga awm thawktute hmalakna leh inpekna vanga nih thu a tarlang tel bawk.

WHO hian India-in MNTE a nuaibona hi kum 2015 April khan tichiangin, hei hi khawvel puma nuaibo a nih theihna tura huntiam aia hma daih a ni bawk. Khawvel pum huapa vantlang hriselna tihhmasawnna tura duan hnuaiah, naupiang 1,000 zelah neonatal tetanus case pakhat ai tlema tihhniam tuma hma lak a ni.