India leh Bangladesh in thuk zawka hnam nunphung huanga thawh dun rel

India leh Bangladesh sorkar chuan hnam ziarang leh nunphung mila thawh dunna thuk zawk siam leh, hmanlai rimawi leh folk art-te bakah hnam thil hlute humhalhna kawnga thuk zawka thawh dun an rel. Thawh dunna tur hi Bangladesh-a kumtin lawm ṭhin Nazrul Borsho hmannaah an sawi ho a ni.

Sorkar thuchhuah tarlan danin, Bangladesh khawpui Dhaka-ah India High Commissioner Dinesh Trivedi leh Bangladesh cultural affairs minister Nitai Roy Chowdhury-te chuan inbiakna an nei a, he hunah hian minister of state for cultural affairs Ali Nawaz Mahmud Khayyam pawh a tel ve bawk.

Inbiaknaa an sawi ho zingah hian Kazi Nazrul Islam puala hman ṭhin, 'Nazrul Borsho' hmanna pui ber te, classical music, folk art leh hnam hmun hlui vawnhim zel dan turte a tel. Tualchhung rimawi leh hnam kut chhuakte entirna zau zawk neih dun nan intlawh tawnna leh inrin tawnna nghet zawk zawn dun an remti.

Nazrul Borsho puala hun hman hi May 25, 2026 aṭanga nakkum May 25 thleng, kum khat chhung a awh dawn a ni. Ram pasalṭha leh "Bidrohi Kobi" tia hriat Nazrul-a piancham vawi 127-na lawmna pui ber a ni dawn a ni. West Bengal-a piang, Nazrul hi a hla leh thuziakte chuan zalenna sual lai leh inremna siamna kawngah nghawng lian tak a lo nei tawh ṭhin a ni.