Sorkar laipuiin ramri hnaiha khaw 2,616 hmasawnna turin Rs vbc 11,639.46 ruahman

Sorkar laipui chuan ramchhunga international ramri hnaiha khuate sum leh pai, leh mipui khawsakna tihhmasawn a, raltlan leh pem kual ṭhin awmte khuahkhirh nan 'Vibrant Villages Programme' (VVP) Phase-II hnuaiah khaw 2,616 te puihna tur atan Rs vbc 11,639.46 a pawmsak thu Thawhṭanni khan a puang. He hmalakna hmang hian tun hmaa ramri hnaih khuate enhran ṭhinna chu tiboin economy ṭhanlenna atana hma lak a ni ang.

Prime minister Narendra Modi hoa Cabinet Committee on Security (CCS) meeting-ah VVP phase hnihna atana ruahmanna hi duangin, sum ruahman hian kum 2028-29 a thleng a huam ang. VVP Phase-I hnuaiah khaw 662 hmasawnna atan Rs nuai 4,800 ruahman a lo ni tawh bawk. Phase-II hian ramri depa khuate dinhmun chawikan kawngah nasa takin nghawng a nei thei dawn a ni.

VVP Phase-II hnuaia khaw kilkhawr zawk leh hmasawnna hmu tlemte tana puihna an ruahman hian state 15 leh Union Territory 2-a district 32 hnuaia block 120 te a huam tel. A huam chinte hi Arunachal Pradesh, Assam, Bihar, Gujarat, Himachal Pradesh, Jammu & Kashmir, Ladakh, Manipur, Meghalaya, Mizoram, Nagaland, Punjab, Rajasthan, Sikkim, Tripura, Uttarakhand leh West Bengal te an ni.

Hmarchhak state dangte tan pawh he ruahmanna hian ramri humhalhna tihchangtlunna tura kalkawng ṭha, kawlphetha, leh digital network thlunzawm kawngah thil pawiimawh tak a thlen belh dawn. Ramri hnaiha cheng ten awmhmun sawn loa anmahni khua ngeia eizawnna kawng hrang hrang an neih zui zel nan leh ramri chhehvelin dinhmun duhawm tak a neih theih nan he VVP-II hi duan a ni.