Nepal tuilian tuarte tan India-in DNA test hmanga puihna pe dawn

Nepal rama tuilianin chhiatna nasa tak a thlen mekah mi bo leh thi zawn chhuahte hriat hran tuma beihna chhunzawm zel a ni. He chhiat thlenga bo hringtu nu leh pa, unau, leh fa India rama awmte tan Central Home Ministry leh Ministry of External Affairs (MEA) te chuan India ram chhunga Central leh State Forensic Science Laboratory (CFSL/SFSL) leh National Forensic Sciences University (NFSU)-ahte DNA profiling tia puihna pek a tum.

August 26-a Nepal leh Tibet inrinaa tui lian thleng avang khan mi 1,250 vel an thi tawh a, mi 5,000 zet an la bo mek a ni. Ruang hmuh chhuah tawh zinga a tam zawk chu an taksa a chhiat tawh em avangin tunge an nih hriat hran a harsa hle a, heng mite hriat hranna atan hian Nepal Police te chuan 'Autosomal STR' DNA profiling hman hi an rawt a ni.

India rama lab hrang hrang aṭanga DNA sampling leh test tihte hi Nepal Police-te hnenah thawn leh a ni dawn a ni. Kathmandu a Indian Embassy nen pawh thawk hoin, DNA profile te hi inthawn theih a ni dawn bawk. Tuilian vanga chhiatna thleng hi India sorkar chuan pawi a tih thu tarlangin, kawng hrang hranga puihna pek a inpeih thu a sawi a, thlawhtheihna hmangin chhan chhuahna hna thawhna tur puihna tur hrang hrang pawh a lo thawn tawh bawk.