Police thuam chak nan Rs vbc 24,000 ruahman tih Supreme Court hrilh

Ram chhunga police-te tunlai zawka thuamchakna turin sorkar laipui chuan 'Police Modernisation Mission' atan Rs vbc 24,000 ruahmanna a duang mek tih Supreme Court a hrilh. He mission hi kum nga chhunga hman tura ruahman a ni a, state police forces leh Central Armed Police Forces (CAPF)-te chu technology changkang zawk hmanga thuam thar a tum a ni.

He ruahmanna siam hi Supreme Court bench, Justice Vikram Nath leh Justice Sandeep Mehta-te hmaah sorkar aiawh Additional Solicitor General chuan a thlen a ni. Supreme Court chuan Udaipur police station-a CCTV hman theih loh chungchang leh, kum 2021-a 'Paramvir Singh Saini vrs Baljit Singh' case-a hmun tina police station-a CCTV dah ngei tura a thupek chhuah tawh kalpui a nih leh nih loh endik laia thlen a ni.

Supreme Court thupek chuan police station-a CCTV-te chu night vision leh audio recording nei tura tih a ni a, footage-te hi a tlem berah kum khat chhung zel a vawnghim tur tih a ni bawk.

Sorkar aiawh chuan he umbrella scheme atana rawtna hi Finance Ministry-a Department of Expenditure hnenah thawn a nih tawh thu a hrilh. Bench chuan kar hnih chhungin he ruahmanna kimchang hi court hmaah pharh turin hriattirna a pe chhuak nghal.