Tamil Nadu khawpui kawng siamṭhat nan Rs vbc 1,850 ruahman

Tamil Nadu chief minister C. Joseph Vijay chuan Assembly session-ah thu sawiin, Chennai leh khawpui dang danga tui lakna leh lei hnuaia tuihawk luanna siam avanga kawngpui chhiate chu zawh a nih hunah kawng chhiate siamṭhatna leh thawm ṭhatna turin Rs vbc 1,850 ruahman a ni tih a puang.

Hmalakna hi 'Vetri Tamilagam Vision' hnuaiah thawh niin, Chennai khawpui chhunga km 35-a thui kawngte chu 'People-Friendly Modern Streets'-ah chantir a ni dawn a ni. Hemi hnuaiah hian kea kalte tana hmun nuam leh zirlaite tana kawng him siam a ni ang a, traffic jam tihkiam nan kawtthler 105 siamṭhat a ni bawk ang. He project thawh nan hian Rs vbc 110 ruahman a ni a, khawpui dang atan Rs vbc 165 ruahman a ni dawn bawk.

Sorkar chuan khawpui chhunga zirna inte tihchangtlun leh tihhmasawnna atan Rs vbc 335 a ruahman a, he ruahmanna hnuaiah hian zirna-ina classroom-te chu tunlai leh changkang zawka siam thar tum a ni bawk. Hei bakah hian boruak thianghlim a theih dan ang ang a humhalh a nih theih nan thing maktaduai khat phun a ni dawn bawk.

Hemi bakah hian Madurai leh Cuddalore khawpui te tan tuithianghlim supply tihchangtlun nan project hrang hrang atan Rs vbc 1,000 leh project dang 33 atan Rs vbc 300 ruahman a ni bawk. Tirunelveli leh Salem Municipal Corporation hnuaiah 'waste-to-energy project' pahnih din a ni dawn a, state pumah park thar 250 siamnan Rs vbc 175 hman tura ruahman a ni bawk ang.