India leh Bangladesh-in Parliament thawh dunna tihchangtlun an tum

Bangladesh-a India High Commissioner Dinesh Trivedi chuan Nilaini khan Bangladesh Parliament speaker Maj Gen (retd) Hafiz Uddin Ahmad leh deputy speaker Barrister Kayser Kamal-te chu Jatiya Sangsad (Parliament)-ah hmuin, ram pahnih parliament inlaichinna leh thawh dunna tihchangtlun zel dan tur hrang hrangte an sawi ho.

Indian High Commission Dhaka-in thuchhuah a siamah, High Commissioner Trivedi chuan sovereign leh democratic ram pahnihte inkarah ram mipuite inlaichinna tihchak zualna turin Parliament pahnih inlaichinna leh thawh dunna chu a pawimawh hle a ni tih a sawi. He inkawmnaah hian thawh dunna tura Parliamentary Friendship Group din dan tur te, speaker pahnihte kaihhruaina hnuaia MP delegation-te inlawm tawn dan tur te, Parliamentary Committee inkar thawhhona leh parliament record-te digitise zawk dan tur chungchangte pawh an sawi ho nghal a ni.

High Commissioner hian Lok Sabha Speaker Om Birla aiawhin Bangladesh speaker leh deputy speaker-te chu India tlawh ngei tura sawmna pawh a hlan chhawng nghal a ni. Tualchhung leh ram pahnih inkar inlaichinna hmasawn zel dan tur sawi hona hian inremna thar leh thawhhona thar tam tak a hring chhuak tura beisei a ni bawk.