India leh Belgium-in thawh dunna tihchak zui zel tum

Prime minister Narendra Modi leh Belgium prime minister Bart De Wever-te chu Ningani khan New Delhi-a Hyderabad House-ah inkawmin, ram pahnih inlaichinna tihchak zel dan tur leh thawh dunna zau zawk a awm theih dan tur an sawi dun. Belgium PM hi PM Modi-a sawmnaa rawn zin a ni a, karleh Ningani thleng a cham ang.

De Wever hi kum 20 chhunga Belgium PM zinga India rawn tlawh hmasa ber a ni, kum 2025 February thlaa sorkar siam hnuah a rawn zinna hmasa ber a ni bawk. PM De Wever hi Belgium defence minister Theo Francken leh official pawimawh hrang hrang ten an rawn ṭawiawm a ni. De Wever hian a rawn thlen hlima hun a hman hmasak bernaah Rajghat-a Mahatma Gandhi hriatrengna hmunah pangpar a hlan. External Affairs Ministry thupuangtu Randhir Jaiswal chuan helai hmuna a thiltih hi ram pahnih inkar inlaichinna nghet tak leh remna leh muanna an ngaihpawimawh zia lantirtu a nih thu a sawi.

Inbiaknaah hian sumdawnna lama inlaichinna, sipai lam thawh dunna, science & technology, leh thil dang hrang hrang te sawi ho a ni. Belgium hi India tan European Union (EU) chhunga thawhpui pawimawh tak a ni a, kum 2025-26 chhung khan ram pahnih insumdawn tawnna hi USD tld 13.01 a tling pha a ni.

Belgium PM hi Confederation of Indian Industry (CII) sumdawng ho intawhkhawmnaah a tel dawn a, India leh European Union FTA chungchangte sawi a ni ang. Chumi hnuah Mumbai panin lunghlu leh lawngchawlhna hmun enkawltu hotute a hmu leh bawk ang.