India leh Uzbekistan-in thawh dunna hrang hrang tihhmasawn tum

Prime minister Narendra Modi leh Uzbekistan president Shavkat Mirziyoyev-te chuan Pathianni khan Tashkent-ah delegation-level inbiakna pawimawh tak neiin, ram pahnihte inkar thawhdunna tihhmasawn leh zual turin inremna an siam. Prime minister Modi-a’n Uzbekistan ram a tlawh tum li-na niin, ram pahnihte'n strategic partnership tihlen zel nan inbiakna hrang hrang hi an nei .

Ram hruaitu pahnihte inbiaknaah hian sumdawnna bakah investment, defence, energy leh digital connectivity-te huanga thawh dunna tihchak chungchang an sawi dun a ni. Modi leh Mirziyoyev-te hian ram pahnihte hmathlir pawimawh 'Viksit Bharat' leh 'Yangi Uzbekistan' tih hlawhtlinna tura in thlawp tawn a, inzawmna tihhmasawn nan ruahmanna hrang hrangah thawh dun an remti. India nena nuclear energy hmanga thawhdunna pawimawh tak Uranium lak luh chungchang duante pawh inbiaknaah hian sawiho a ni tel bawk.

PM Modi chuan India leh Uzbekistan strategic partnership hi kum tinin hma a sawn zel a, key sector hrang hranga thawhdunna tihhmasawn zel chu ram pahnihte hmakhua atan a pawimawh hle a ni, a ti. Tashkent-a a zin chhung hian PM Modi hian Uzbek Yoga Federation bultuma Yoga session neihna a telpui a, Indian community-te kawmin hun a hmanpui bawk. Uzbekistan a tlawh zawh hian PM Modi hi Bishkek, Kyrgyzstan-ah zin chhunzawmin SCO Summit a tel zui dawn a ni.