India leh China-in LAC chungchang thlir dana inhriatthiamna thar siam chho zel

India leh China te chuan Line of Actual Control (LAC) ramri chungchanga thlirdan inanglote, in hriatthiamsak tawnna tura inremsiamna kawng hawn nan inbiakna thar an nei. Beijing hmuna Special Representatives (SR) inbiakna vawi 25-na zawhah thuchhuah inṭawm siamin, ramri venhimna leh inenkawlna tluantling zawk a awm theih nan hma lak zel an remti a ni.

Inbiakna hi National Security Adviser (NSA) Ajit Doval leh China foreign minister Wang Yi te hruaina hnuaia neih a ni a. Ram pahnih hotute chuan ramria thlir dan leh pawm dan in an lohna hmunte hmu thiama, thlir dan ṭha zawk siamte hmang tangkaiin, boruak pangngai leh inremna ṭha siam chhoh chu an thil tum ber a ni bawk.

Eastern leh Western Sector hmunahte ramri thlirdan in an loh avangin inhmuh thiam lohna leh buaina a thlen fo ṭhin thute tarlan a ni a. Remruatna thar tihchhuah takah chuan diplomatic leh military channels te, WMCC leh commander-level meeting te hmanga inbe pawh zui reng tura inremsiam a ni zui ve bawk a ni.

Expert Group on Boundary Delimitation te'n ramri inrinaa harsatna lian a awm lohna hmun aṭanga ṭanin 'Early and Substantial Harvest' hmuh tuma hma an lak zui tur thu tarlan a ni bawk. Kum 1996 leh 2020 hnua inbiakna hrang hrang lo awm tawhte bawhzuina aṭangin tuna hmalakna thar hi ramri inkar boruak zangkhai chhoh zelna tur a nih beisei a ni bawk.