Supreme Court-in 'Samadhan Samaroh 2026' a khar; case 1,700 ching fel

Supreme Court chuan a vawi khatna atana a buatsaih 'Samadhan Samaroh 2026' ni thum awh Special Lok Adalat chu Pathianni khan hlawhtling takin a hmawr an bawk fel. He Special Lok Adalat neih chhung hian chhungkua, in leh lo, accident, chhiah leh hna chungchang kaihhnawih case 1,712 zet chu inremna siampuiin a chingfel a ni.

Chief Justice of India (CJI) Surya Kant kaihhruaina hnuaia buatsaih, Special Lok Adalat hi August 21-23 chhung khan Supreme Court-ah hian hneh taka neih a ni. Ni 3 chhung hian case 3,285 zet ngaihtuah niin, chung zinga case 1,664 te chu Lok Adalat bench ten inremna an siampui a, case 48 dang hi mediation kaltlanga chinfel a ni thung.

He hmalakna,'SAMADHAN' Supreme Court Action for Mediated Adjudication and Disputes Harmonization Across Nation hi April 21 khan bul ṭan niin, court-a thubuai tang tam takte pre-settlement process kaltlangin an lo ngaihtuah ṭan tawh a ni. Ni thum chhung hian cheng vaibelchhia 240.94 hu zet chu inremna siamna atan hian tihfelpui a ni bawk.

Supreme Court chuan hetianga Special Lok Adalat leh pre-settlement a buatsaih ṭhin hi mipuite tana court kal man leh hun khawhral tur venna a nih bakah, judiciary rorelna atana case tangkhang tihtlemna kawnga thawh hlawk tak a nih thu a tarlang.