Ramri buaina sawi turin NSA Ajit Doval-a'n China VP Han Zheng a kawm

India leh China ramri buaina chungchanga inbiakna pawimawh, Special Representatives (SR) talks ṭum 25-na neih a nih hmain, National Security Advisor (NSA) Ajit Doval chuan Thawhlehni khan China vice president Han Zheng a hmu. Ram pahnih ramri biala remna leh ralmuanna a awm zui zel theih nan leh thawh hona tihchak a nih theih nana ruahmannate an sawi dun.

NSA Ajit Doval hi inbiakna nei tur hian Thawhṭanni khan Beijing a thleng a, China foreign minister Wang Yi nen ramri buaina an sawi dun hmain VP Han Zheng hi a hmu hmasa a ni. China-a Indian Embassy tarlan danin, hruaitu pahnihte hian ram pahnih hruaitu luten inremna an lo siam tawhte bawhzui a, ramri biala muanna a awm zui zel nan politcal, economic leh multilateral fora hrang hranga inlaichinna tihchak zel dan tur an sawi.

Kum 2020-a Galwan Valley buaina leh Ladakh biala sipai inepna thlen hnuah ram pahnih inlaichinna hi a ṭha lo hle a; mahse, tun hnaiah boruak tihdaih nan leh inlaichinna pangngai awm leh nan hma lak chhoh zel a ni.

SR talks hi kum 2003 khan km 3,488 a thui ramri buaina chinfelna tur leh ram pahnih inkar boruak pangngai taka awmtir reng a nih theih nana ruahman a ni. Ram pahnih aiawhte hian ramri buaina chinfel zui a nih theih nan leh thawh hona a taka bawhzui a nih nan inbiakna hi an chhunzawm zui zel ang.