Education Minister hoin CBSE exam kalphung tihchangtlun dan tur sawi ho

Central Board of Secondary Education (CBSE) kalphung leh zirna changtlung zawka tihmasawn dan tur ngaihtuahin union education minister Pralhad Joshi, School Education leh Literacy Department hotu liante chu Thawhṭanni khan ṭhukhawmin an sawi ho.

Education Minister hian a X account-ah Thawhṭannia an inkawmna chungchang hi tarlangin, CBSE-in zirna, a bikin exam buatsaih kalphung leh inrelbawlna lam hmasawn a ngaihna hrang hrangte ngunthluk takin an sawi ho tih a tarlang. Zirlai leh zirtirtute tana awlsam zawka sorkar kalphungte kalpui a, rinawm leh fiah zawka hna thawh a nih theih na atan an ṭhutkhawmna neih chu a hlawkthlak hle a ni, a ti.

Kumin CBSE exam result chhuakah khan zirlai chhanna endikna kawngah On-Screen Marking System an hman avangin harsatna leh sawi zui a hlawh hle. Zirlaiten an beisei aia mark an hmuh tlemte, scan ṭha lote leh mimal chhanna phek kimlo awm palhte avangin lungawi lohna a tam a, hei vang hian CBSE hotu lian ṭhenkhat bang leh inthlak kualna pawh a thlen phah a ni.

Heng harsatnate hi enfiah a, exam buatsaihna leh result siam kawngah thianghlim leh felfai zawka hna an thawh theih nan sorkar laipui chuan hma a la zui mek a ni. Minister Pralhad Joshi hian University Grants Commission (UGC) leh All India Council for Technical Education (AICTE) hotute nen zirna in sang zawk chungchang leh zirlai zinga infiamna huang 'Khelo Bharat' tihhmasawn dan turte pawh an sawi zui nghal bawk.