India Post-in Drone hmanga lehkha leh parcel thawn kalpui ṭan

India Post chuan tlangram leh hmun kilkhawra mite lehkha leh parcel thawn zung zung a nih theih nan Himachal Pradesh leh Assam state-ah drone hmanga thil thawnna pilot project a kalpui ṭan. Tlang ram leh lui lian tak tak kaltlanga postal service chak zawk a awm theih nan India Post hian he ruahmanna hi a siam a ni. Ruahman anga kalpui a nih hunah chuan Himachal Pradesh-ah route 110 leh Assam-ah route 40, a vaiin route 150 chu drone hmanga lehkha inthawn theih a ni tawh ang.

A taka hman a nih hmasakna ber turin Himachal Pradesh-a Mandi Head Post Office aṭangin Rehardhar Branch Post Office inkarah drone hi thlawhtir a ni. A hmaa a hmun kal nana hun hman ṭhin darkar 2 chuang chu minute 7 chhung chauhin drone hmang hian thawn thlen niin, transit time hi a tihniam hle.

He pilot project tana thlawhtir hmasak ber hi Independence Day denchhen leh 'Har Ghar Tiranga' campaign hnuaiah hman a ni a, drone hian National Flag (Tiranga) chu phur telin Rehardhar-ah Army veteran hnenah tluang takin a hlan chhawng a ni. Drone hmang hian postal bag zangkhai leh kg 10 china rit a phur thei a, km 5 aṭanga km 80 a hla thleng thlawh tir theih a ni. He technology hi Gurugram-based firm 'Skye Air Mobility' nen ṭang dunin AI-based traffic management leh autonomous drones hmanga ruahman a ni.

He ruahmanna hmang hian thil thawn zung zung bakah tlangram leh kilkhawra pension document, postal banking, insurance leh sorkar service pawimawh dangte mipui tana awlsam zawka thlen tir tum a ni.