India leh Japan-in tuipui venhimna tur thuthlung ziak

India leh Japan chuan nimin khan New Delhi-ah tuipui lama thawh dunna chak zawka kalpuina tur inremna thar, ‘Memorandum of Arrangement on Maritime Security Cooperation’ an ziak. He inremna hi Navy-te thawh hona tur niin ram pahnihte tana ṭangkai thei tura duan a ni bawk.

Defence minister Rajnath Singh leh Japan defence minister Shinjiro Koizumi ten inbiakna an neih hnuah inremna hi ziah a ni. Ram pahnih defence minister-te hian Indo-Pacific bial ralmuang leh zalen, tuifinriat hmanga sumdawnna leh venhimna chak zawk a awm theih nana thawh dunna tur a nih thu an sawi.

Inremna thar hian India Navy leh Japan Maritime Self-Defense Force (JMSDF) te tan tui chung leh tui hnuaia venhimna leh operation neihte chak zawkin a pui thei tawh dawn a ni. Ram pahnih sipaiten nunchan zir hona leh defence equipment inṭawm leh insiam ṭawm chungchangah hma thar an lak theih phah bawk ang.

Japan defence minister Koizumi hian India a rawn thlen tirhin Mumbai-a Western Naval Command a tlawh nghal a, India sipaite inrintawkna leh hnathawh dante a hmunah a hmuhpui a ni. Thawh hona thar hian ‘Make in India’ hnuaia ralthuam siam leh radar/antenna system (UNICORN) inṭawm chungchangah pawh rah ṭha tak a chhuah tura ngaih a ni.