Hindu leh Sikh lakah huatna avanga pawikhawihna thleng a pung

Federal Bureau of Investigation (FBI) data lakkhawm, Asian Americans Advancing Justice (AAJC) leh Sikh Coalition in an zirchianna aṭangin US-ah Sikh leh Hindu-te lakah huatna vanga pawikhawihna thleng chu kum 2025-ah a pung. Kum 2024 aiin kum 2025-a Sikh laka pawikhawihna thleng chu 24.6% a pungin,Hindu laka pawikhawihna thleng chu 12% in a pung bawk.

Hetih laiin FBI data-ah chuan chawhrualin a pumpuiah inhuatna avanga pawikhawihna thleng chu 7% in a tlahniam thung. Mahse, US-a pem lut hmuhsitna leh Sikh emaw Punjabi emaw truck khalha eizawng awmte chu vantlang himna atana pawi thei anga puhna a thleng bawk tih AAJC leh Sikh Coalition-te hian an hmu chhuak a ni.

FBI statistic aṭanga a landanin, kum 2024 nena khaikhinin Asia mi huatna vanga pawikhawihna chu a tlahniam tih hmuhchhuah a ni a, mah se hripui len hma nena khaikhin erawh chuan a la pung hlek hlek tih AAJC zirchianna chuan a hmuchhuak bawk. Hei bakah US huam chhunga Asian American laka pawkhawihna thleng ṭhenkhat, data-ah report kim loh a awm nia sawi a ni bawk.

Sikh Coalition chuan kum 2025 September thla khan anti-Sikh hate crime hi a sang fal hle a, thla khat chhungin case 26 a awm hman tih an tarlang. Florida state-a truck driver Harjinder Singh-a chetsualna thlen hnuah a pung zual a ni. AAJC aiawh Sim J. Singh chuan sakhaw tlem zawkte venhimna tura sorkar puihna tlahniam chuan harsatna a thlen nia sawiin, FBI data-ah hian thil thleng tam tak lang lo a awm thei tih a tarlang.