NTA siam ṭhatna kal mekah thawktu mi 600 ban

National Testing Agency (NTA) chuan Union Education Ministry-in a hriattir angin exam kalphung siamṭhat leh tihhmasawnna tura bei mekin, exam buatsaih leh vil tura a rawih expert 600 zet chu an ban thu leh a thara thlak an nih thu an puang. Siamṭhat beihpui thlak thawh khatnaah hian Question Paper endikna 4-tier system siam a ni tih an tarlang.

Union education minister Prahlad Joshi chuan August 17-a NTA hotute nena an inkawmnaah, exam rintlak leh tluang taka neih a nih theih nan infrastructure leh venhimna kawnga mamawh zawng zwngte chu buatsaih fel vek turin a hriattir a ni. He hriattirna khauh tak tihchhuah a nih hnu hian NTA hotute chuan thawktute ban an nih thu leh, thawktu thar 20 aṭanga 25 vel chu kar hnih thum hnuah dah fel an nih tur thu an sawi.

Heng bakah hian exam buatsaiha 'Confidential Operations' venhim a nih zual theih nan Central Industrial Security Force (CISF) venhimna hnuaiah NTA pisa hi hmun tharah sawn a ni ang. Thawktu thar administrative leadership post 10 hnawh khatna tur pawh adverstise tura buatsaih mek a ni bawk.

Tun kar tira UGC-NET paper-a buaina leh thil dik lo awm avanga Sociology, Commerce leh English subject-te re-exam neih tur thu puan a nih tak vang leh, tun hnaia NEET-UG paper a leak hnua mipui leh zirlai pawlten NTA chungah rin tawk lohna an lantir hnuah sorkar chuan exam system siamṭhatna tur hian hma a la zui a ni.