Sorkar laipuiin exam buaipui dan zirchiang turin NTA hriattir

National Testing Agency(NTA) in UGC-NET paper pathuma re-exam a buatsaih tur thu a puan hnuah, union education minister Pralhad Joshi chuan NTA official-te meeting neihpuiin ram chhunga exam neihna hrang hranga dik lohna leh harsatna thleng ṭhinte siam ṭha a exam kalpui dan zawng zawng chik taka endik a, hma lak zui dan tur report 'corrective action report' pe vat turin a hriattir.

Union Education Minister chuan Thawhṭanni khan NTA leh Higher Education Department hotute chu New Delhi-ah meeting a neihpui a, exam buaipui dan mumal zawk leh rinawm zawk a awm theih nana hmalakna hrang hrangte a sawipui a ni. Hemi hma lawk hian NTA chuan UGC-NET exam-a Sociology, Commerce leh English paper-ahte a thara exam neih nawn leh a nih tur thu an lo puang fel bawk a ni.

Joshi chuan exam protocol-te famkim taka zawm ngei a ṭul thu sawiin, zawhna siamna leh vawnhimmna lamah ruahmanna thar khauh tak siam a ngai a ni, a ti. NTA hotute chuan buaina thlen hnuah hnathawktu 50 aia tam an hna aṭanga ban an nih tawh thu leh hruaitu thar 10 lak a nih tur thu an tarlang.

Question paper siamte vawnhim a nih zel nan internet nena thlun zawm loh computer system 'air-gapped systems' hman te, cyber security leh domain specialist lak luh chu ruahmanna thar siamah hian telh a nih thu NTA hotute chuan an tarlang bawk. UGC-NET paper pathum re-exam leh tur hi kumin chhunga paper leak kaihhnawih a thlen vawi hnihna niin, May 3 khan NEET-UG exam paper a lo leak tawh bawk a ni.