Gautam Adani laka US court-a thubuai awmte sut a ni

US District Court for the Eastern District of New York chuan Adani Group chairman Gautam Adani leh a tupa Sagar Adani-te laka sum hmanga thamna leh inbumna thubuai criminal charge awm zawng zawng chu a sutsak ta. He thutlukna hian kum hnih chhung zet ngaihtuah lo ni tawh chu a titawp dawn tan a ni.

US Court hian Justice Department (DoJ)-in thubuai hnawl tura Rule 48(a) hmanga motion a thlen chu pawmin, Judge Nicholas Garaufis chuan thutlukna a tichhuak a ni. Thubuai hi 'with prejudice'-a hnawl a nih avangin Adani leh a ṭhiante lakah he thubuai vek hi a thara thlen nawn leh theih a ni tawh dawn lo bawk.

He thubuai hi November 2024-a ngaihtuah ṭan kha niin, India sorkar hotute hnenah solar power contract siampui tura USD mtd 250 thamna pe nia puhna leh, US share hmangtu investor-te bum nia puhna aṭanga inṭan a ni. Adani Group thuneitute erawh chuan he puhna hi rinchhan awm lo leh dawt hmanga inpuhna a ni, tiin an lo pha tawh ṭhin a ni.

Thutlukna chhuah a nih hnu hian Gautam Adani chuan X -ah thuchhuah siamin, "Rorelna dik leh thudik chungah kan rinna a nghing ngai lo. Rorelna dik a thleng ta hi kan hlim hle a ni," tiin rorelna court hnenah leh India ram thuneitu leh mipuite hnenah lawmthu a sawi nghal bawk.