CJP bultumin thingtlang khuaa sorkar sikulte siam ṭha tura nawrna campaign nei dawṭ

Cockroach Janta Party (CJP) dintu Abhijeet Dipke chuan Thawhṭanni khan ram chhung thingtlang khua a sorkar sikulte dinhmun tihchangtlunna leh siam phuisuina turin ram pum huap campaign thar an kalpui leh tur thu a puang. Campaign hi August 15, Independence Day aṭanga ṭan tur niin, campaign chu nu leh pa bakah, khaw hruaitu ten thlawp turin a ngen nghal bawk.

Campaign hmang hian thingtlang khua a sorkar sikulte zirna in hmunhma leh ek-in bakah tui thianghlim awm ṭha lo te chinfel a nih theih nan khawtlang hruaitu leh nu leh pate ṭang rual turin Dipke hian a chah bawk. Dipke chuan ramin kum 80 zalenna kan lawm dawn chhunga hnufualna lian ber chu thingtlang sorkar sikulte enkawl zui loh hi a ni tiin, ṭhalaite leh tualchhung hruaitute chu he hma laknaah hian thawhho puiah a sawm.

Nu leh pate pawh an fate zirna sikulte enfiah a, electric, tui thianghlim, ek-in leh chawchhun 'mid-day meal' dawn ṭhin dante endik turin a chah a, hmunhma ṭha tawk lo a awm a nih chuan video hmanga chhinchhiah turin an chah bawk. CJP hi a tirah fiamthu hmanga political platform-a vawrh lar a nih hnuah, exam dik lo chungchanga New Delhi-a Jantar Mantar-a ni 36 chhung an nawrh hnu khan ram pum huap ṭhalaite thlawp pawl puitlingah ngaih a ni zui ta a ni.