Parliament house pahnih RS leh LS-ah bill pakhat ve ve pawm

Parliament monsoon session neih mek chu nimin khan ṭhut khawm vawi 16-na neih leh niin eptu pawl te'n chhan hrang hrang avanga aubuaina an thlen chhunzawm leh hnuaah ṭhutkhawm chu house hnihah tihtawp lai lawk ni zui mah se, Lok Sabha-ah bill pali pharh niin pharh zinga pakhat The Tribunals Reforms Bill, 2026 chu pawm a ni a, Rajya Sabha-ah hian voice vote hmangin The Bankers’ Books Evidence Bill, 2026 pawm a ni bawk.

LS-ah hian bill pali The Tribunal Reforms Bill, 2026, the Mines and Minerals (Development and Regulation) Amendment Bill, 2026, The Kerala (Alteration of Name) Bill, 2026 leh The National Co-operative Development Corporation (Amendment) Bill, 2026-te pharh niin, sawi hona awm loin The Tribunals Reforms Bill, 2026 hi pawm niin LS hi vawiin a chhunzawm turin tihtawp zui a ni.

Hetih laiin bill ngaihven hlawh The Foreign Contribution (Regulation) Amendment Bill, 2026 pawh opposition leader kaihhruainaa sawihona neih tum a ni mah se sawihona neih theih a ni zui ta lo thung. Hei bakah hian bill pawm thar pahnihte hi eptu pawl lamin house chhung leh parliament kawta protest an nei chunga pawm niin, eptu pawl lam hian home minister Amit Shah chu house-a kal turin an ngiat zui bawk.

Congress president Mallikarjun Kharge chuan Amit Shah-an zirlai nawrh huaihawtte chunga tharum thawhna chungchanga thuchhuah a siam loh chhan zawt bawkin, parliament a rorelna mumal kal theih loh chhanah hian sorkar laipui chu a mawh phurtu an nih thu a sawi. Kharge chuan eptu pawlte chuan sawihona neih an duh mai chauh tih sawiin, mahse, PM Modi leh Shah-te chuan sawi hona neih chu an hlau niin a puh zui a ni.