Lirthei lei tharte tan SC-in third party insurance cover pawtsei

Supreme Court chuan ramchhung hmun hrang hrangah lirthei thar leitute tana tih ngei ngei tur, third-party motor insurance coverage hun chhung chu kum khatin a pawtsei. Car thar leitute tan kum 4 chhung leh two-wheeler lei tharte tan kum 6 chhung compulsory third-party insurance hian a huam tawh dawn a ni.

Justice Sanjay Karol leh Justice Prashant Kumar Mishra te ṭhutna bench chuan ram chhung kawngpuia accident thleng ṭhinah lirtheiten insurance an neih loh avanga a tuartute leh an chhungten zangnadawmna an hmu lawk thei lo ṭhin chu pawi an tih thu an tarlang. Insurance Regulatory and Development Authority of India (IRDAI) leh General Insurance Council (GIC) ten insurance cover period pawt sei lo tura an rawtna hnawlin, kawngpui hmangtute leh accident tuartute humhalhna a nih zawk avangin insurance hun chhung pawhsei hi a ṭul hle tiin thutlukna an siam ta zawk.

Lirthei insurance nei lote khuahkhirh a, hma lak a awlsam zawk nan Supreme Court chuan ruahmanna pawimawh tak a chhawp chhuak tel bawk. Petrol pump-a tlan lut lirthei insurance nei lote hnenah petrol/diesel pe lo tura pilot project kalpui dan tur zir chiang turin IRDAI leh Ministry of Road Transport & Highways te a hriattir a ni. Hei bakah kawngpuia ANPR camera-te chu VAHAN database leh Insurance Information Bureau (IIB) te nen zawmin, police te pawhin app hmanga hmunpui aṭanga real-time-a insurance status check theihna an nei tawh bawk ang.

He hma lakna hnuaiah hian lirthei leitute tana duhthlan theih policy chi li duang turin hriattir an ni. Lirthei accident thlengte chak zawka chinfel a nih theih nan Motor Accident Claims Tribunals (MACT)-a March 31, 2022 hmaa thil thleng Detailed Accident Report (DAR) awmte pawh state police te chu rang taka court-a theh lut turin thupek chhuah a ni bawk.