ESIC-in insurance claim thei chin hlawh bithliah tihsan tum

Employees State Insurance Corporation (ESIC) meeting Thawhlehnia New Delhi-a neihah hnathawktu aiawh kalte chuan sorkar laipui hnenah ESIC insurance hlawkna tel thei tur chinte hlawh bithliah, Rs 21,000 ni ṭhin chu Rs 30,000-ah tihsan an phut thu an thlen.

Thawhlehni khan New Delhi-a ESIC board ṭhutkhawmah thawktu aiawhte chuan ESIC hamṭhatna la thei tur mi ṭhahnem zawk an awm theih nan hlawh bituk tihsan an duh thu an sawi. Ṭhutkhawm kaihruaitu, union labour minister Mansukh Mandaviya chuan trade union hotute hnenah an thil phut chu sorkar laipui chuan ngaihtuah mekin, a rang lama thutlukna siam a nih tur thu a hrilh.

ESIC Board-a Bharatiya Mazdoor Sangh (BMS) aiawh S. Durairaj chuan, hlawh bituk hi tihsan a nih chuan tun hmaa ESIC hnuaia inziak lut, mi vaibelchhia 3.8 bakah thawktu nuai 50 chuangin hamṭhatna hi an dawng thei dawn a ni. State hrang hrangah thawktute hlawh tlem ber bituk 'minimum wage' chu tuna ESIC hlawh ceiling Rs 21,000 aia a san zawk tawh avangin, tidanglam tur hian hma lak a ṭul tawh takzet thu ESIC Director General Ashok Kumar Singh hnenah pawh an lo thlen tawh tih a sawi.

Ṭhutkhawmah hian ESIC-in damlo ten enkawlna an hmuh awlsam zawk nan sorkar enkawl Primary Health Centre (PHC)-te nen inremna ziah rawtna chu trade union lam hotuten an sawisel a, PHC-te chu mipui nawlpui tana awm sa a nih avangin ESIC hian anmahni pual hmunhma leh enkawlna tihchangtlun tum zawk se, an ti.