Kum 6 hnuah India-China ramria insumdawn tawnna kawng hawng leh ta

India leh China insumdawn tawnna kawng, Nathu La Pass chu Covid-19 hripui leng leh ramria innghirnghona thleng avanga kum ruk liamtaa khar tawh chu Inrinni liam ta khan hawn a ni leh ta.A hawnna inkhawm buatsaihah Sikkim commerce & industries minister Tshering T Bhutia chuan a telpui a ni.

T Butia chuan he thil thleng hi thil chhinchiah tlak tak a nih thu sawiin, China nen ramri kaltlanga sumdawnna kalpui leh a nih theihna tur hian prime minister Narendra Modi leh Sikkim chief minister Prem Sing Tamang-te thawh rimna leh hmalakna nasa tak vang a nih thu a sawi. Ramri sumdawnna kawng Nathu La hi Thawhṭanni aṭanga Ningani thleng hawn ṭhin a ni dawn a, November thla thleng he ruahmanna hi kalpui phawt a ni ang.

Sumdawnna kawng hawn thar leh hian a chhehvela tualchhung mite sum dinhmun nasa takin a tihmasawn thei dawn a, he hmalakna hmang hian inkalpawhna leh sorkar hriatpui sumdawng leh sumdawng hrang hrangte tan inghahna tlak a ni thei dawn a ni. Tun dinhmunah ram pahnihte hian helai kawng kaltlanga bungraw in leisak tawn theih 35 siam a ni a, a huam zat tihbelhna tur hian Sikkim sorkar chuan Director General of Foreign Trade hnenah dilna a thlen mek bawk.