President Murmu-i'n anti-paper leak bill pawm

Tunlai ram chhung boruak luah hnehtu, leh zirlai tam takin an lo beisei tihhlawhtlinna tur exam paper leak kaihhnawih chhui leh hrem theihna tur dan khauh zawka siamṭhat, Public Examinations (Prevention of Unfair Means) Amendment Bill, 2026 chu president Droupadi Murmu chuan a pawmpui hnuah dan a hman a ni dawn ta. Parliament in hnihin an pass hnuah, Murmu hian Zirtawpni liamta khan bill pawmpuiin a hming a ziah hnan a ni.

Law Ministry chuan president Murmu-i'n bill a pawmpui tawh thu hi a tarlang a ni. Dan siamṭhat hnuaiah hian ram chhunga paper leak thubuai reng rengah chhuichianna chu thlahnih chhunga zawhfel tura tih a ni a; paper leak kaihhnawiha inhnamhnawihte pawh kum 5 - 10 chhung lungin tan leh pawisa Rs nuai 50 thleng chawi theihna te a tel bawk. Organise crime-ah erawh a tlem berah lungin kum sarih tan leh Rs vbc 10 chawi theihnate a tel.

He bill hlawhtlin theihna tur hian nasa takin sorkar nawr a nih bakah, New Delhi leh ramchhung hmun hrang hrangahte zirlai ṭhahnem takin May 3-a NEET-UG 2026 exam paper leak duh lohna lantirin nawrh an huaihawt bawk. Dan pawm thar hian kum hnih chhung lo hman tawh anti-paper leak law (the Public Examination Act) a thlak dawn a ni. Dan tharah hian paper leak kaihhnawiha hrem theih chi hrang 15 a huam. Hrem theih zingah hian question paper ti leaktu, OMS sheet tihchingpen, website lem siam, leh admit card lem pek chhuahte pawh a huam vek a ni.