NEET-UG counselling 2026 awlsam zawka kalpui a ni dawn: JP Nadda

Union health minister JP Nadda chuan Ningani khan NEET-UG counselling neih dan tur inpuahchahna hrang hrangte a enfiah a; zirlaite tan awlsam leh ṭha zawka counselling kalpui a nih theih nan ruahmanna thar ṭhahnem tak siam a nih thu a puang.

NEET-UG counselling 2026-ah hian technology lam tihchangtlunna bakah zirlaite tana ṭha tur hmalakna student-centric reform te kalpui a ni dawn a, hman awlsam leh admission kalhmang awlsam zawkte siam tel a ni. Heng ruahmanna tharte hian zirlai leh nu leh pate tan hmun hla zawka kal ngai leh sum leh pai sen hnem lutuk ngai ṭhinte chu a chhawk beisei a ni.

Ruahmanna thar hnuaia thil pawimawh zual pakhat chu 'one-time physical reporting framework' a ni. Seat chang ten seat an chan hnuah online kaltlangin 'Freeze' emaw 'Float' emaw Option an thlang thei tawh ang. 'Freeze' thlangtu zirlai chuan a seat channa zirna inah kalin document pawimawh leh fee pek ngaite a va tifel ang a; 'Float' thlangtu, seat ṭha zawk beiseia round dawt leha tel zui duh erawh chuan a hmuna kal kher loin online kaltlangin a buaipui zui vek thei dawn a ni. Hemi chhung hian physical reporting neih leh original document submit kher a ngai tawh dawn lo.

Counselling round 3-na zawhah seat chang zawng zawngten an zirna in turah a hmuna in report-in admission formalities zawng zawng an tifel tawh thung ang. Mahni seat chan tawh duh leh lote tan pawh zirna in va tlawh ngai loin MCC Counselling Portal kaltlangin online-in a tihfel theih tawh dawn bawk.

NRI category hnuaia dilna lut zawng zawng pawh digitise vek a ni a, email kaltlanga thawn a nih rualin portal-ah upload vek tur a ni ang. Document Verification Officers ten online-in an lo endik ṭhin tawh dawn a; rualbanlo (PwBD) te tan pawh awlsam leh mumal zawka counselling buaipui a nih theih nan ruahmanna fel tak siam a ni.