Delhi-a BRICS summit neih turah Xi leh Putin tel tum

BRICS Summit vawi 19-na chu September 12 leh 13 hian New Delhi-ah neih a ni dawn a, he hunah hian China president Xi Jinping leh Russia president Vladimir Putin te pawhin tel an tum. Sorkar laipui chu summit thleng tur hian a inbuatsaih mek a ni. Summit-ah hian Iran president Masoud Pezeshkian pawh a tel beisei a ni bawk.

Xi Jinping lo zin tur chungchangah hian foreign secretary Vikram Misri chuan July 27 leh 28 khan Beijing a tlawh a, Chinese Communist Party hotute nen inlaichinna tihchak leh inbiakna thawh hnihna kalpui dan tur thil pawimawh hrang hrang an sawi ho. China official-te pawhin inbuatsaihna leh venhimna hna endikin tun hnaite khan Delhi an rawn tlawh tawh bawk. Xi hi summit-ah a rawn tel a nih chuan kum 2019 hnua India a rawn tlawh lehna hmasa ber tur a ni.

Russia President Vladimir Putin-a tel tur thu pawh hi May thlaa BRICS Foreign Ministers meeting naa Russia foreign minister Sergey Lavrov-a'n Delhi a tlawh ṭum khan a lo sawi lang tawh a ni. Lavrov chuan India leh Russia inkara inlaichinna leh BRICS hnuaia thawh hona chu a kal tluang hle tih a sawi.

India hian BRICS member ram hrang hrangte nen inlaichinna tichak turin hma a la chho mek a, New Delhi-a summit neih tur hi geopolitics leh ram hrang hrang inkar boruak tihdaihna tura ṭan lakna pawimawh tak a ni dawn nia ngaih a ni. BRICS-ah hian member ram 11 - Brazil, China, Egypt, Ethiopia, India, Indonesia, Iran, Russia, Saudi Arabia, South Africa leh UAE an awm a; thawhpui ram eng emaw zat an nei bawk.