Foreign secretary Misri leh China Vice FM Chunying-te inkawm

China ram tlawha zin, foreign secretary Vikram Misri leh China vice foreign minister Hua Chunying-te chu Thawhṭanni khan Beijing-ah thawh dunna hrang hrang sawiin an inkawm. Misri chuan Communist Party of China (CPC) Central Committee-a Vice Minister of the International Department Sun Haiyan a hmu bawk a ni.

Misri leh Hua hian ram pahnih ten thawh dunna hrang hrang an lo neih tawh thlirletna neiin, an hma thlirte neihte an sawi dun bawk. Ram pahnihte chuan an hlawkpui ve ve theih tur sumdawnna leh economic huangahte thawh dun zel an tum thu Indian Embassy chuan a sawi. Ram pahnihte inkar buaina chu inrelbawlna ṭha siama chinfel leh mihring leh mihring inkar tihṭhatte, zirna huang leh think-tank kaltlanga thiamna inthleng tawnte chu ngaihtuah a nih thu embassy chuan an tarlang tel bawk.

Foreing Secretary hian Chinese People's Political Consultative Conference (CPPCC) hruaitu Hong Liang pawh hmu bawkin, ram inrelbawlna aṭanga mipui thleng phak thawh dunna neih chungchangte an sawi dun. Misri hi China-a India ambassador hna thawk ṭhin a ni a, nimin khan China official dangte pawh meeting a neihpui a ni. Misri zin hma hian external affairs minister S Jaishankar leh China foreign minister Wang Yi-te chuan July 21 khan Manila-a Association of Southeast Asian Nations (ASEAN) summit neih kar lakah meeting an lo nei tawh bawk a ni.