Ramri hnaih thingtlang khuate chu 'first village' an ni : PM Modi

Prime minister Narendra Modi chuan Pathianni khan India ramri hrula khaw awmte chu 'khaw tawp ber' ni tawh loin, ram chhunga 'khaw hmahruai' first village an ni tawh zawk tih a sawi a; khawpui leh khaw hmasawnte chu sorkar hmathlir, 'Viksit Bharat' (Developed India) dinna atana lungphum pawimawh tak an ni tih a sawi.

Viksit Vibrant Village Programme hnuaia ram pum aṭanga khaw 245-a volunteer ṭhalai 5,000 hnenah internet kaltlanga thu sawiin, PM Modi chuan he hmalakna hian ṭhalaite leh ramri hrula chengte inpawhtir a, ram nghet tak a din theihna kawngah nasa takin a pui tih a tarlang. Ram chhung district 250 dawn aṭanga ṭhalai thawkrim tak takte an tel thei chu lawmawm a tih thu a sawi bawk.

Sorkar hmalakna 'My Youth India' 'MY Bharat' platform chungchang sawiin Modi chuan, ram pum aṭangin ṭhalai maktaduai tam tak an inpek tawh thu leh thawh hlawk tak tak an nih thu a sawi. "Kum rei lote liam ta chhung khan ramri bula khaw awmte chu inla hrang leh hlamchhiah, an mamawh bulbal pawh hmu mumal lo anga thlir ṭhin an ni. Mahse, heng harsatna karah hetiang khuaa chengte rilrua an ram hmangaihna a reh eih lo hi a chhuanawm hle a ni," a ti.

Prime minister chuan sorkarin thil thlir dan a thlak hnuah ramri bula khaw awmte tihhmasawnna atan kawng pui, electric, tui pipe, gas connection leh high-speed internet-te thlenga thlen tir a ni tawh tih a sawi. Kuthnathawk leh vantlang nunphung tihhmasawnna hian ramri bula chengte tan eizawnna dang a hawng a, khualzin hipna leh zirna lamah pawh hmasawnna duhawm tak a thlen chho ta zawk a ni, a ti bawk.