India chu khawvel puma defence huanga thawhpui rintlak ber a ni: PM Modi

Prime minister Narendra Modi chuan nimin khan thla tina radio-a hun a hman ṭhin, 'Mann Ki Baat' chu hmang lehin, India chu ram hrang hrang tana defence huanga thawhpui rintlak ber a nih thu a sawi. India chu defence huangah hmasawn zawngin a thiltihtheihna leh chaknate a ṭhang chhunzawm zel a ni, a ti bawk.

Prime Minister chuan kum 1999-a Kargil war India sipaite hnathawhte chu fakin, kha inbeihnaa sipai huaisenna leh thawhrimna chu a fakawm hle tih a sawi.Kargil inbeihna chuan vawiin thlengin mahni inrintawkna a pe tih a sawi.

India in vawiin ni thlenga defence lam atana ṭangkai tur bungrua a siam chhuah leh ram danga a thawn chhuah ṭhinte chuan, nghet leh tluang takin hmalam panin a kal zel a ni tih a lantir tih Modi chuan a sawi. July thla chhung hian India chuan a ralthuam siam BrahMos leh Astra missiles chu Indonesia hnenah hralh turin inremna an tifel a, hemi bakah hian DRDO pawhin Pinaka Long Range Guided Rocket hlawhtling taka enchhinna nei a ni tiin, hengte hian India hmsawnna a tarlang tih a sawi bawk.

Modi chuan Vikram-1 hlawhtling taka kahchhuah a ni chuan ram mipuite thinlungah inrintawkna a tuh tih sawiin, mipuite chuan India space sector huanga hlawhtlinna hriatreng tur an tawng a ni, tiin a sawi. Vikram-1 hi India-a private sector rocket siam hmasak ber a nih thu sawiin, innovator naupang tak takte chuan an thiamna, theihna, dawhtheihna, leh suangtuahnate a takin an chantir a ni, a ti.