President Droupadi Murmu-in North Macedonia thleng

President Droupadi Murmu chu Nilaini khan ni hnih cham turin North Macedonia a thleng a, India President zinga he ram tlawh hmasa ber a ni. President Murmu hian Europea ram pathum tlawh turin a zin chhuak a, India nena thawh hona leh inlaichinna tichak zual tura inbiakna hrang hrang a neihpui dawn a ni.

North Macedonia president Gordana Siljanovska-Davkova nen ram pahnih thawh dunna siam dan tur an sawi dun dawn a, prime minister Hristijan Mickoski leh Assembly speaker Afrim Gashi te hmuin North Macedonia Parliament-ah thu a sawi bawk ang.

India leh North Macedonia sumdawngte puala buatsaih, 'India-North Macedonia Business Forum'-ah thu a sawi dawn a; lo neih, pharmaceuticals, science & technology leh Information Technology (IT) sector-a inlaichinna chungchang sawi zauna hman a ni dawn a ni. President Murmu hian Skopje-a awm Mother Teresa hriatrengna 'Memorial of Mother Teresa' a tlawh bawk ang. Mother Teresa hi kum 1910 khan Skopje, tuna North Macedonia khawpui-ah a piang a, kum 1928-a Ireland kaltlanga India rama a lo kal hma khan Skopje-ah hian a cheng a ni.

North Macedonia a tlawh zawhah Murmu hi Romania president Nicusor Dan-a sawmna angin Romania ram a pan dawn a, kum 30 chhunga India president-in Romania a tlawh leh hmasak berna a ni bawk ang.