India lawngpu thihna kaihhnawihah India-in Russia palai ko

Sorkar laipui chuan nimin Thawhlehni khan Ukraine tuipui kama Guinea Bissau lawng beihnaa India mi thawktu pali thihna thleng chungchangah Russia charge d'affaires (CDA) Vladimir Ladanov a ko. Ministry of External affairs chuan July 19-a lawng beihna thleng chu a dem thu tarlangin, thil thleng chungchang sawifiah tur hian Russia aiawh Ladanov hi a ko a ni.

MEA chuan Russia CDA hnenah hian India lungawi lohnate chu thuneitute hnenah thlen tura an ngen bakah, commercial lawng beihnain thihna a thlen chunchangte chu pawm theih a nih loh thu leh pawisawi lote nunna zah lohna a nih thu a sawi. Hetianga beihna thleng chu tuipuia insumdawn tawnna himna, leh ngelnghetna tichhetu a nih thu an tarlang bawk.

Russia-in Pathianni liam taa lawng an kah hi MV Golden Leo, Guinea-Bissau lawng niin Ukraine tuipui kawng a zawh laia beih a ni a, lawngah hian Syria mite bakah India mi 17 hna thawkin an awm. Ukrain Air Force chuan lawng hi Russian cruise missile hmanga beih a nih thu tarlang a ni.