J&K-ah ruahsur vangin mi 4 thih belh, ni hnih chhungin mi 16 thi tawh

Jammu & Kashmir bial hrang hrangah ruah nasa taka a sur zui zel hnuah, ruahsurin chhiatna hrang hrang a thlen avangin nunna chan zat chu ni hnih chhungin mi 16 an tling chho tawh. Nimin Thawhtanni khan mi paliin nunna an chan belh leh bawk a ni.

Chief minister Omar Abdullah chuan district tinte chu July 24 thleng darkar 6 dan zela an dinhmun report thawn turin thuchhuah a siam a; Police, Army, SDRF leh Civil Defence personnel-te pawh a ṭul huna che chhuak tura inralrin tir an ni bawk.

Chhiatna thlen nasatna, Poonch leh Rajouri district-ah te ruahpui vanawn sur a la reh loh avangin chhanchhuahna hna thawktuten harsatna an tawk chhunzawm zel a, tun thlengin mi pasarih an la bo mek a ni. Thawhṭanni zing khan Doda district-a Raggi Nallah bul, Jammu-Kishtwar national highway-ah lung tlain passenger bus a delh a, rescue team-ten mi pali an chhan chhuak a, damdawi in an thlenpui hnuin pakhat a thi a, mi pakhat hriat chian loh ruang hmuh a ni bawk. Lung tla avang hian helai kawngah hian inkalpawh theih a nih loh bakah lirthei dang pawh lung hian a delh in mi dang eng emaw zat an tangkhang a ni. Kashtigarh bialah nu pakhat chu an in bula lung tlain a delh hlum a, Rajouri khawpui Salani biala lui lianin a lak Vikas Ahmed ruang pawh hmuh chhuah a ni tawh a ni.

Meteorological Department chuan July 23 thleng ruah pui vanawn leh tuilian nasa thlen tura an rin thu tarlangin, lui leh tuilian thlen theihna hmun hlauhawm bula chengte fimkhur tura hriattirna an tichhuak. Union home minister Amit Shah chuan J&K Governor leh Chief Minister-te be pawpin an dinhmunte enfiah turin a ti a, sorkar laipuiin a ṭul anga ṭanpuina a pek tur thu a hrilh.