Parliament Monsoon session ṭan, rorel theih lohin tihtawp a ni zui nghal

Parliament Monsoon session chu nimin khan ṭan a ni a, ṭan ni hian prime minister Narendra Modi chuan thu sawiin MP zawng zawngte chu session-ah debate awmze nei tak nei turin leh ram hmasawnna thlen tur zawnga inpe turin a ngen nghal. Hetih laiin rorelna ṭan a nih hnuah eptu pawl lam chuan NEET paper leak leh Ram temple donation ruk chungchang sawi ngiatin an au buai nghal a, session hi tihtawp lailawk a ni zui nghal.

Ṭhutkhawm tihtawp lailawk a nih hma hian house chhungah hian in auhbuaina lian tham vawi ruk bawr thleng hmanin; parliamentary affair minister Kiren Rijiju pawhin house chhunga buaina awm chhung chuan rorel chhunzawm theih a nih loh thu a sawi lang bawk.

Nimina ṭhutkhawm hi chawhma dar 11 bawrah ṭan niin eptu pawl lam hian aurualnate neiin, speaker Om Birla chuan loh theih lohin ṭhutkhawm hi a titawp lailawk zui a ni. Rorel chhunzawm leh hnuah pawh buaina hi a la chhuah chhunzawm avangin ṭhutkhawm hi tihtawp zui leh niin, nimin atan tihtawp a ni zui bawk. Rorel inkhawm tihtawp a nih hma hian law minister Arjun Ram Meghewal chuan Supreme court judge 34 aṭanga 38 a tihpunna tur bill a pharh nghal a ni.