President Murmu Europe ram pathum tlawhin zin chhuak

President Droupadi Murmu chuan nimin Pathianni khan Europe ram pathum - Moldova, North Macedonia leh Romania-te tlawh turin a zinchhuak. Heng ram pathumah hian sector hrang hrang - sumdawn tawnna, technology huanga thawh dunna leh mipui leh mipuite in pawh tawn theihna turte chu ram hruaitute a sawipui dawn a ni.

Murmu hian Moldova a tlawh hmasa ber a, hei hi India president-in Moldova ram a tlawhna hmasa ber a ni. Moldova president Maia Sandhu nen inkawmin Republic of Moldova Parliament president Igor Grosu a kawm bawk ang. President hian India mi chengte a kawm bakah Moldova-India Parliamentary Friendship Group-a Business Forum-ah thu a sawi dawn bawk.

North Macedonia president Gordana Siljanovska-Davkova sawmna tihlawhtlingin Murmu hian July 21 leh 22 hian North Macedonia hi a tlawh leh ang. Hei pawh hi India president-in he ram a tlawhna hmasa ber a ni dawn bawk. President Murmu leh President Siljanovska-Davkova chuan thawh dunna tur an sawi dun bakah, PM Hristijan Mickosk hmuin Assembly of North Macedonia-ah thu a sawi ang.

Romania president NicuÈor Dan sawmna anga he ram hi a tlawh dawn bawk a, a cham chhung hian ram hruitu hrang hrang kawmin India-Romania Business Forum ah thu a sawi ang. Romania hi EU thawhpui ram pawimawh tak niin, India-EU Free Trade Agreement hmang khan India leh Romania tan pawh thawh dunna kawng ṭha tak a in hawng mek bawk.