Sonam Wangchuk damdawi-ina sawn chhan sorkarin sawifiah

Climate activist leh educator Sonam Wanchuk chu Inrinni liam ta khan tiamchin awm loa a chawnghei nawrh a neihna,New Delhi-a Jantar Mantar aṭangin Safdarjung Hospital-ah sawn a ni. Sorkar chuan Wangchuk chu hriselna lam dinhmun avang leh, vawiina Parliament Monsoon session ṭan tur leh Cockroach Janta Party(CJP) ten kawng zawh huaihawt an tum vanga sawn a nih thu a tarlang.

Wangchuk hi sorkar laipui thupek angin police-te chuan damdawi-in lamah an sawn a ni. Vawiin aṭanga Parliament ṭhutkhawm ṭan a nih dawn avang leh CJP ten kawngzawh buatsaih an tum avangin venhimna khauh leh ṭha zawk chu parliament house bul hnaihah hian dah a ni bawk. CJP te hian NEET exam paper putru avang khan union education minister Dharmendra Pradhan chu bang turin an phut a ni.

CJP kawng zawh turah hian Sajdarjung Hospital aṭangin Wangchuk chuan lehkha hmangin kawngzawh hlawhtling tak nei tur hian a rawn fuih a, he kawng zawh hi 'second freedom movement' anga ngai tur leh ṭha taka thlawp turin mipuite a ngen. Hei bakah hian kawngzawh hi 'hlauhna aṭanga zalenna' leh 'thil dik lo aṭanga zalenna' a nih thu a tarlang. Wangchuk huan Jantar Mantar aṭanga damdawi-in lama sawn a nih avang hian 'dik lo taka khung beh ka ni' tiin damdawi-in a awm thu hi a tarlang tel bawk.