India-in UN-a Palestine member nih dilna thlawp

India chuan Palestine-in United Nations member ni tura a dilna thlen chu a thlawp tih Brussels-a Palestine Donor Group meeting neihah Ministry of External Affairs (MEA) secretary Sripriya Ranganathan chuan a puang. UN General Assembly-a vote thlakna neihah khan Palestine thlawp zawngin India hian vote a lo thlak tawh bawk.

India chuan Israel leh Palestine inkar buaina chungchangah lehlam lehlam aṭanga buaina chinfel chu an thlawp a, ram pahnihte tana international law zulzuia ramria himna leh muanna a awm chu a duh ber thu a tarlang bawk. Ranganathan chuan meeting-ah hian India chuan Palestine nena inlaichinna thuk tak leh hmanlai ata tawh inkungkaihna nghet tak a lo nei tawh ṭhin tih a sawi.

Hei bakah hian India hian puihna, hmasawnna hrang hrang thlen thei thil leh, chhawmdawl ngaite puihna chu Palestine mipuite hnenah a pek ṭhin thu Ranganathanchuan a tarlang. Palestine tana hmalakna kalpui mek hrang hrang healthcare, hmeichhe dawmkanna leh project lian zawk thawh mek a nih thu a sawi bawk a ni.