Audit report-in Ladki Bahin scheme tan uchuak taka sum hman tih tarlang

Maharashtra-a hmeichhe dawmkanna tur scheme duan, 'Mukhyamantri Majhi Ladki Bahin Yojana' sum hman dan enfiahnaah, he scheme hmang hian uchuak taka sum hman niin, budget ruahman aiin Rs vbc 3,544 in an lo hmang tam tawh zawk tih hmuh chhuah a ni.

He scheme hi kum 2024 June thla khan hmeichhia, kum 21 aṭanga 65 inkarte thla tina puihna atan Rs 1,500 ṭheuh pek ṭhin an ni a, hmeichhe rethei leh chak lo zawkte sum hmanga puihna tura duan a ni.

Kum hnih chuang scheme hi kalpui ni tawhin, sum tam tak sen ral a ni. Hmeichhiate himna, zirna, hriselna leh eizawnnate chu Ladki Bahin scheme hmang hian duangin, hmeichhe puala duan sum sen tamna ber a ni bawk. Hei vang hian scheme kalpui danah zawhna tam tak a pian phah a, Comptroller and Auditor General (CAG) chuan tunhnai khan audit neiin, sorkar chuan he scheme atan hian Rs vbc 33,237.24 a lo hmang tawh tih hmuh chhuah a ni. He scheme atana budget ruahman hi Rs vbc 29,693.09 a nih laiin, enfiahnaah budget hi Rs vbc 3,541.16 in an lo hmang pel tawh tih hmuhchhuah a ni ta a ni.

Maharashtra sorkar chuan enfiah a nih hnuah, he scheme hnuaia pawisa dawng thei tura dah nuai 92 chu list aṭangin a paih a, hemi hnu hian scheme hlawkna teltu hi sorkar kum kallaiah vbc 2.43 ah an tlahniam tawh a, a tlakhniamna hi 38% a tling bawk. State sorkar chuan an Gender Budget kaltlangin hmeichhiate tan One Stop centre chu hmeichhe hleilenna tawkte tan an siam bakah, Working Women Hostels, Ujjawala, leh self help group kaihhnawih kutkawih eizawnna tihhmasawnna tur atan ruahmanna a siamsak bawk.