All party meeting July 19-ah nei dawn

Sorkar laipui chuan Parliament Monsoon session neih tur pualin, session ṭan hma ni July 19 khian 'All Party Meeting' a ko a, he hunah hian sorkar chuan session ṭhut khawm atana agenda pawimawhte an tarlang ang. Eptu party lamte chuan session neih tur atana harsatna awm leh buaina chinfel ngai an tihte an tarlang ve thung dawn a ni.

Parliament Monsoon session neih turah hian sorkar chuan constitutional amendment bill 'The 130th Constitutional Amendment Bill' pharha tum a, hei vang hian boruak pawh a lian hle tura ngaih a ni. He bill-ah hian prime minister, minister, leh chief minister chu pawikhawihna lian leh pawi tham kaihhnawiha a zawna ni 30 chhung judicial custody-ah dah an nih chuan, a ni 31 naah an nihna aṭanga ban hlen theihna tur dan siam a ni. He Bill hi eptu lamin an sorkarna state-te sawi nghing thei hmanrua a nih an hlauhthawn avangin an dodal nasa hle. Amendment bill hi tlang tur chuan Parliament member thum a ṭhena hmun hnihin an thlawp a ngai dawn a ni.

Session lo awm tura hian eptu lam chuan NEET-UG paper leak chungchang te, defence minister Rajnath Singh-a'n Operation Sindoor-a thi zat a sawi chungchangte sawi chhuah ngei an tum ve bawk. Session hi July 20 - August 13 chhung neih a ni ang.

Sorkar laipui hian Parliament session neih dawn apiangin, tihdan phungah neiin session ṭan hma ni hian all party meeting a ko ṭhin a ni.