India leh Taliban sorkar-in agriculture huanga thawh dunna tur sawi ho

Afghanistan-a rorel lai, Taliban kaihhruai sorkar nen agriculture huanga thawh dunna thuk zawk neih chungchang chu sawi ho a nih thu Ministry of External affairs chuan Pathianni liamta khan a puang. Afganistan hian India chu agriculture huanga kawng hrang hrang - agriculture trade, infrastructure hmasawnna leh lo neihna tura tui lakna kawngahte thawhpui an duh niin MEA chuan a tarlang.

India leh Afghanistan-a rorel lai Taliban hruaitute chuan ni ruk chhung, July 7-12 chhung khan inbiakna an nei a ni. He thawh dunna thar sawi tur hian Afghanistan aṭangin agriculture, irrigation and livestock minister Abdullah Omari chu India-ah a rawn zin a; ram pahnihte hian thawh dunna kalpui mek thlir let chhungin thawh dunna thar kalpuina turte chu zirchianna an nei nghal bawk.

Ram pahnihte hian agriculture kaihhnawih hrang hrang, irrigation, ran vulh, agriculture research, zirna, zau zawka thawh dunna neih leh agri-trade chungchangte an thlir ho a ni. Hei bakah hian ei leh in himna, thlai chi, leh thlai thar tihpun theihna tur chungchangte an thlir ho nghal a; India chuan Afghanistan nena agricultur-te huang thawh dunna kaltlangin sik leh sa mil tur leh thlai chi thar tam thei chi hrang hrang hmanga puih a tum tih MEA chuan a tarlang.

Taliban minister Omari chuan India a cham chhung hian agriculture kaihhnawih minister hrang hrang kawm nghal bawkin thawh dunna tur chungchang hi a sawipui a ni. India hian ei tur, damdawi leh nitin mamawh hrang hrang chu Afganistan-in a tlakchham mek avangin puihna tur hian Chabahar port kaltlangin a thawn chhuak reng ṭhin a, US-Iran buaina avang hian he tuikawng kaltlanga thil thawn hi a khaihlak mek thung a ni.